2025-nji ýylyň 14-nji martynda Türkmenistanyň Türkiýe Respublikasyndaky Baş konsullygy tarapyndan Halkara parahatçylyk we ynanyşmak ýylyna, şeýle hem Türkmenistanyň hemişelik Bitaraplygynyň 30 ýyllygyna bagyşlanan brifing geçirildi.
Çärä Bahçeşehir uniwersitetiniň hem-de Stambul şäherindäki ýokary okuw mekdepleriniň “Türk dünýäsi” klubynyň ýolbaşçy düzümi, Türkmenistanyň, Azerbaýjanyň, Gazagystanyň, Özbegistanyň talyp ýaşlary, şeýle hem ýerli KHBS-iň habarçylary gatnaşdylar.
Türkmenistanyň Stambul şäherindäki Baş konsuly M.Öwezow öz çykyşynda Halkara parahatçylyk we ynanyşmak ýyly mynasybetli geçiriljek halkara çäreleriň ähmiýetini nygtady. Brifinge gatnaşyjylara Türkmenistan tarapyndan öňe sürülýän halkara başlangyçlar barada hem maglumatlar berildi.
Şonuň bilen birlikde, möhüm şanly wakalaryň – Türkmenistanyň hemişelik Bitaraplyk derejesine eýe bolmagynyň 30 ýyllygynyň we Birleşen Milletler Guramasynyň döredilmeginiň 80 ýyllygynyň utgaşyp gelmeginiň 2025-nji ýylyň ähmiýetini has-da artdyrjakdygy bellenildi.
Çäräniň çäklerinde türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň “Hakyda göwheri” atly kitabynyň tanyşdyrylyşy hem geçirildi.
