BMG-niň Baş Assambleýasynyň «Halkara parahatçylygy, howpsuzlygy we durnukly ösüş işini goldamakda hem-de berkitmekde bitaraplyk syýasatynyň orny we ähmiýeti» atly Kararnamasyna bagyşlanan maslahat

2026-njy ýylyň 23-nji maýynda Türkmenistanyň Daşary işler ministrliginiň Halkara gatnaşyklary institutynda BMG-niň Baş Assambleýasy tarapyndan kabul edilen «Halkara parahatçylygy, howpsuzlygy we durnukly ösüş işini goldamakda hem-de berkitmekde bitaraplyk syýasatynyň orny we ähmiýeti» atly Kararnamasyna bagyşlanan maslahat geçirildi.

Çärä Türkmenistanyň Daşary işler ministrliginiň ýolbaşçylary we işgärleri, Türkmenistanda akkreditirlenen diplomatik wekilhanalaryň hem-de halkara guramalarynyň wekilhanalarynyň ýolbaşçylary hem-de wekilleri, Türkmenistanyň DIM-niň Halkara gatnaşyklary institutynyň professor-mugallymlary hem-de talyplary gatnaşdylar.

Maslahaty Türkmenistanyň DIM-niň HGI-niň rektory G.Ýusupowa alyp bardy.

Maslahatyň dowamynda Türkmenistanyň Daşary işler ministri Raşid Meredow, Türkmenistanyň DIM-niň HGI-niň Parahatçylyk we bitaraplyk kafedrasynyň müdiri Aksoltan Ataýewa, ÝUNESKO-nyň işleri boýunça Türkmenistanyň Milli toparynyň jogapkär sekretary Çynar Rüstemowa, BMG-niň Ösüş maksatnamasynyň Türkmenistandaky Hemişelik wekili Narine Saakýan, Hytaý Halk Respublikasynyň Türkmenistandaky Adatdan daşary we Doly ygtyýarly Ilçisi Szı Şumin, Amerikanyň Birleşen Ştatlarynyň Türkmenistandaky Adatdan daşary we Doly ygtyýarly Ilçisi Elizabet Rud, şeýle hem BMG-niň Merkezi Aziýada Öňüni alyş diplomatiýasy boýunça sebit merkeziniň Adam hukuklary boýunça geňeşçisi Armands Pupols çykyş etdiler.

Türkmenistanyň daşary syýasat edarasynyň ýolbaşçysy öz çykyşynda BMG-niň Baş Assambleýasy tarapyndan kabul edilen Kararnamanyň dünýä jemgyýetçiliginiň Türkmenistanyň daşary syýasat ugruny goldaýandygyny tassyklaýandygyny belläp, parahatçylyk söýüjilikli başlangyçlaryň durmuşa geçirilmeginiň türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň we Türkmenistanyň Prezidenti Serdar Berdimuhamedowyň öňdengörüjilikli syýasaty netijesinde mümkin bolandygyny nygtady.

R.Meredow Kararnamanyň tekstinde öz beýanyny tapan birnäçe başlangyçlara aýratyn üns çekdi. Şolaryň hatarynda Türkmenistanda parahatçylyk, bitaraplyk we öňüni alyş diplomatiýasy meselelerini öwrenýän Akademiki merkezi döretmek, BMG-niň Tertipnamasyna laýyklykda Parahatçylyk ugrunda Araçylyk edarasyny döretmek, şeýle hem bitaraplyk ýörelgelerini berjaý etmek boýunça Gollanmany taýýarlamak ýaly başlangyçlar bar.

Kararnama şeýle hem Prezident Serdar Berdimuhamedowyň bitaraplyk ýörelgelerine esaslanýan Ählumumy howpsuzlyk strategiýasyny taýýarlamak baradaky başlangyjyny öňe sürmegi göz öňünde tutýar. Onuň maksady dialog, araçylyk, döwletleriň özygtyýarlylygyna hormat goýmak we jedelleri parahatçylykly çözmek arkaly halkara howpsuzlygynyň adalatly we durnukly ulgamyny kemala getirmekden ybaratdyr. Türkmenistan parahatçylygyň we durnuklylygyň bähbidine bu başlangyçlary durmuşa geçirmekde halkara jemgyýetçiligi bilen işjeň hyzmatdaşlygy mundan beýläk-de dowam etdirmäge taýýardygyny tassyklaýar.

Çykyşlaryň dowamynda Türkmenistanyň sebit we halkara parahatçylygyny, durnuklylygyny hem-de durnukly ösüşi üpjün etmekdäki yzygiderli döredijilikli ornuna aýratyn üns çekildi. Maslahata gatnaşyjylar Türkmenistanyň hemişelik bitaraplyk syýasatynyň mundan beýläk-de döwletleriň we halklaryň arasynda halkara hyzmatdaşlygyny hem-de özara düşünişmegi pugtalandyrmagyň möhüm görkezijisi bolup hyzmat etjekdigine ynam bildirdiler.

Maslahatyň ahyrynda oňa gatnaşyjylar Türkmenistanyň Hormatly Prezidenti Serdar Berdimuhamedowa Ýüzlenme kabul etdiler.