2025-nji ýylyň 8-nji aprelinde Türkmenistanyň hemişelik Bitaraplygynyň 30 ýyllygy we 2025-nji ýyl – “Halkara parahatçylyk we ynanyşmak ýyly” diýlip yglan edilmeginiň çäginde Türkmenistanyň Wenadaky Ilçihanasy ýörite sergi gurady.
Çärede Türkmenistanyň hemişelik Bitaraplyk syýasatynyň düýp manysyny, taryhyny we häzirki zaman ähmiýetini görkezýän kitaplar we medeni-taryhy eserler ýygyndysy görkezildi.
Sergilenen eserleriň arasynda Türkmenistanyň Prezidenti Serdar Berdimuhamedowyň we türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň ajaýyp eserleri ýerleşdirildi. Bu eserler Türkmenistanyň Bitaraplygynyň filosofiýasynyň, onuň parahatçylyk söýüjilikli daşary syýasatynyň we ýurduň halkara dialoga hem-de hyzmatdaşlyga yzygiderli ygrarlylygyna çuňňur düşünje bermekde aýratyn ähmiýete eýedir.
Çärä Wenadaky halkara guramalarynyň, BMG-niň we ÝHHG-niň ýanynda akkreditlenen ilçiler we hemişelik wekiller, diplomatik korpusyň agzalary, halkara guramalarynyň we köpçülikleýin habar beriş serişdeleriniň wekilleri, häzirki wagtda Awstriýanyň ýokary okuw mekdeplerinde bilim alýan talyplar we ýaşlar gatnaşdylar.
Sergi Türkmenistanyň parahatçylyga we ynanyşmaga çagyryşyny görkezip, medeni alyş-çalyş we özara düşünişmek üçin oňyn atmosferanyň döremegine ýardam berdi.
