2023-nji ýylyň 22-nji martynda Lýuksemburgdaky "Palais Grand-Dukal" atly Beýik gersoglaryň köşgünde, Türkmenistanyň Adatdan daşary we Doly ygtyýarly Ilçisi hökmünde Ilçi Sapar Pälwanowyň Şa hezretleri Lýuksemburgyň Gersogy Anrä ynanç hatlaryny gowşurmak dabarasy geçirildi.
Dabaraly çäräniň çäginde Ilçi Türkmenistanyň Prezidenti Serdar Berdimuhamedowyň adyndan Lýuksemburgyň Beýik Gersogyna mähirli salamlaryny we iň gowy arzuwlaryny ýetirdi.
Gersog Anri, Türkmenistanyň ýolbaşçylarynyň adyndan mähirli sözleri üçin minnetdarlyk bildirip, Ilçiden Türkmenistanyň Prezidenti Serdar Berdimuhamedowa iň mähirli we dostlukly salamyny hem-de Türkmenistan halkyna parahatçylyk we abadançylyk baradaky iň gowy arzuwlary ýetirmegi haýyş etdi.
Monarh bilen duşuşygyň dowamynda ikitaraplaýyn gatnaşyklaryň we köptaraplaýyn platformalarda hyzmatdaşlygyň geljegi ara alnyp maslahatlaşyldy.
Duşuşygyň dowamynda iki ýurduň arasynda syýasy, ykdysady we ynsanperwer ugurlarda hyzmatdaşlygyň mümkinçilikleri bellenildi hem-de söwda-ykdysady gatnaşyklary giňeltmäge aýratyn üns berildi.
