2024-nji ýylyň 8-nji noýabrynda paýtagtymyzdaky «Ýyldyz» myhmanhanasynda «Merkezi Aziýada raýatsyzlygyň soňuna çykmak» boýunça ministrler derejesindäki maslahat geçirildi.
Türkmenistanyň Hökümeti we Birleşen Milletler Guramasynyň Bosgunlaryň işi boýunça Ýokary komissarynyň müdirligi tarapyndan bilelikde guralan maslahata Gazagystan Respublikasynyň, Gyrgyz Respublikasynyň, Täjigistan Respublikasynyň we Özbegistan Respublikasynyň Hökümetleriniň, şeýle-de BMG-niň agentlikleriniň we halkara guramalarynyň wekilleri gatnaşdylar.
Halkara maslahatyň işi 5 sany umumy mejlisiň çäklerinde geçirilip, olaryň barşynda wekiliýetleriň, BMG-niň Bosgunlaryň işi boýunça Ýokary komissarynyň müdirligi we BMG-niň beýleki agentlikleriniň, halkara guramalarynyň, diplomatik wekilhanalarynyň ýolbaşçylary we wekilleri tejribe alyşdylar we halkara başlangyçlaryna ygrarlydyklaryny, meseläni çözmäge döwletleriň aýratyn üns berýändiklerini we indiki görnüşleriň çäklerinde bu işi dowam etdirmäge taýýardyklaryny beýan etdiler.
Maslahatyň dowamynda BMG-niň on ýyllyk #IBelong (#MenDegişli) ählumumy hereketiniň Merkezi Aziýa boýunça netijeleri jemlendi.
Çykyşlarda Merkezi Aziýanyň raýatsyzlyk meselesini çözmek boýunça dünýäde öňdebaryjy orny eýeleýändigi, Türkmenistan bilen Gyrgyz Respublikasynyň raýatsyzlygyň belli bolan ähli ýagdaýlaryny çözen ýeke-täk ýurtlardygy bellenildi.
Türkmenistanyň BMG-niň Bosgunlaryň işi boýunça Ýokary komissarynyň Maksatnamasynyň Ýerine ýetiriji komitetiniň hemişelik agzasy bolmak bilen, onuň 75-nji mejlisiniň çäklerinde Raýatsyzlygyň soňuna çykmak boýunça Ählumumy bileleşige goşulýandygyny resmi taýdan yglan edendigi nygtaldy.
BMG-niň raýatsyzlyk baradaky iki sany Konwensiýasyna goşulan sebitdäki ilkinji ýurt bolmak bilen, raýatlygy bolmadyk adamlaryň derejesini kesgitlemegiň täze amallary ornaşdyrmak we çaga dogluşynyň, şol sanda resminamalary bolmadyk şahslarda ýüz göterim hasaba alnyşyny üpjün etmek arkaly Türkmenistan dünýäde ilkinjileriň biri bolup raýatsyzlygyň belli bolan ähli ýagdaýlarynyň soňuna çykdy.
Häzirki wagtda ýurdumyz #IBelong hereketini üstünlikli tamamlap, raýatsyzlyk boýunça sebitleýin we ählumumy başlangyçlarda öňdebaryjylaryň biri boldy.
Gatnaşyjylar Aşgabatda geçirilen maslahatyň Durnukly ösüş maksatlarynyň Gün tertibine laýyklykda ýurtlaryň Ählumumy bileleşige geçmeginiň möhüm tapgyrynda giňişleýin gepleşikler üçin möhüm meýdança öwrülendigi baradaky netijä geldiler.
«Merkezi Aziýada raýatsyzlygyň soňuna çykmak» boýunça ministrler derejesindäki maslahatynyň netijeleri boýunça jemleýji resminama kabul edildi.
