2024-nji ýylyň 18-nji noýabrynda Türkmenistanyň Prezidentiniň tabşyrygy boýunça Mejlisiň Başlygy D.Gulmanowa Bosniýa we Gersegowinanyň Türkmenistandaky Adatdan daşary we Doly ygtyýarly Ilçisi (oturýan ýeri Tähran ş.) Niýaz Çardakliýadan ynanç hatyny kabul etdi.
Milli parlamentiň ýolbaşçysy döwlet Baştutanymyzyň adyndan diplomaty jogapkärli wezipä bellenilmegi bilen gutlap, oňa iki ýurduň arasyndaky dostlukly gatnaşyklary ösdürmek işinde üstünlikleri arzuw etdi.
Öz gezeginde Ilçi Bosniýa we Gersegowinanyň ýokary derejeli ýolbaşçylarynyň Türkmenistanyň Prezidenti Serdar Berdimuhamedowa iberen mähirli salamyny, ähli türkmen halkyna iň gowy arzuwlaryny ýetirdi.
Duşuşygyň barşynda diplomat oňyn Bitaraplyk, deňhukuklylyk ýörelgelerine esaslanýan syýasatynyň ileri tutulýan ugurlary bilen tanyşdyryldy.
Milli ykdysadyýetimizi innowasion esasda diwersifikasiýalaşdyrmaga we kuwwatyny artdyrmaga, döwrebap düzümleri kemala getirmäge, halkymyzyň abadançylygyny we durmuş derejesini ýokarlandyrmaga gönükdirilen maksatnamalara aýratyn üns çekildi. Şeýle-de Ilçi türkmen parlamentiniň alyp barýan köpugurly işi we düzümi bilen tanyşdyryldy.
Türkmenistan bilen hyzmatdaşlygy ösdürmekde bar bolan mümkinçilikler barada durup geçen Ilçi iki ýurduň arasynda dostluk we özara düşünişmek gatnaşyklaryny pugtalandyrmaga ýardam edýän söwda-ykdysady, medeni-ynsanperwer ulgamlarda döwletara hyzmatdaşlygy işjeňleşdirmegiň möhümdigini belledi.
Duşuşygyň ahyrynda Bosniýa we Gersegowinanyň Türkmenistandaky Adatdan daşary we Doly ygtyýarly Ilçisi Niýaz Çardakliýa döwletara gatnaşyklaryň mundan beýläk-de pugtalandyrylmagy üçin ähli zerur tagallalary etjekdigine ynandyrdy.
