2024-nji ýylyň 10-njy dekabrynda Türkmenistanyň DIM-de Türkmenistanyň Daşary işler ministriniň orunbasary Ahmet Gurbanow bilen Braziliýa Federatiw Respublikasynyň Türkmenistandaky Adatdan daşary we Doly ygtyýarly Ilçisi Marsel Fortuna Biatonyň (oturýan ýeri Astana ş.) arasynda duşuşyk geçirildi.
Braziliýanyň Ilçisi Türkmenistanyň Daşary işler ministriniň orunbasaryna ynanç hatylarynyň nusgalaryny gowşuryp, bildirilen myhmansöýerlik üçin minnetdarlyk bildirdi.
Duşuşykda taraplar syýasy-diplomatik ugurdaky hyzmatdaşlygy ösdürmegiň mümkinçiliklerini ara alyp maslahatlaşdylar. BMG-niň çäklerindäki özara gatnaşyklaryň netijeliligi bellenildi.
Diplomatlar söwda, ykdysady, medeni-ynsanperwer gatnaşyklary giňeltmegiň ýollaryny ara alyp maslahatlaşdylar.
Ilçi Marsel Fortuna Biato geljek ýyl Braziliýada geçiriljek BMG-niň Howanyň üýtgemegi baradaky Çarçuwaly konwensiýasyna gatnaşyjy taraplaryň 30-njy maslahatynyň (COP30) ähmiýetini aýratyn belledi we Türkmenistanyň wekiliýetini oňa gatnaşmaga çagyrdy.
Mundan başga-da, taraplar dünýäniň dürli künjeklerinden myhmanlary Aşgabat şäherine jemlän Halkara Bitaraplyk güni mynasybetli geçirilen çäreleriň ähmiýetini bellediler.
