2024-nji ýylyň 10-njy dekabrynda Prezident Serdar Berdimuhamedowyň tabşyrygy boýunça Mejlisiň Başlygy D.Gulmanowa Braziliýa Federatiw Respublikasynyň Türkmenistanda täze bellenen Adatdan daşary we Doly ygtyýarly Ilçisi Marsel Fortuna Biatodan ynanç hatyny kabul etdi.
Mejlisiň Başlygy Ilçini Türkmenistanyň Prezidentiniň adyndan Türkmenistanda diplomatik wezipä girişmegi bilen gutlap, ikitaraplaýyn hyzmatdaşlygy giňeltmek bilen bagly asylly işinde üstünlikleri arzuw etdi.
Ilçi mähirli kabul edilendigi üçin hoşallyk bildirip, Braziliýa Federatiw Respublikasynyň Prezidenti Luis Inasiu Lula da Silwanyň Halkara Bitaraplyk güni mynasybetli Prezident Serdar Berdimuhamedowa we ähli türkmen halkyna iberen mähirli gutlaglaryny, iň gowy arzuwlaryny ýetirdi.
Duşuşygyň dowamynda Ilçä Türkmenistanda durmuşa geçirilýän giň gerimli özgertmeler we iri möçberli taslamalar barada giňişleýin gürrüň berildi.
Şeýle-de Mejlisiň Başlygy diplomaty Türkmenistanyň sazlaşykly ösüşi üçin berk binýat bolup hyzmat edýän milli kanunçylygyň kämilleşdirilmeginde uly ähmiýete eýe bolan milli Parlamentiň alyp barýan işi bilen tanyşdyrdy.
Taraplar ikitaraplaýyn we köptaraplaýyn görnüşde, iri halkara guramalaryň, Türkmenistan bilen Latyn Amerikasy ýurtlarynyň arasyndaky dialogyň çäklerindäki türkmen-brazil gatnaşyklaryň geljegine ýokary baha berip, döwletara hyzmatdaşlygy işjeňleşdirmäge özara gyzyklanmalary beýan etdiler.
Braziliýanyň işewür toparlarynyň hyzmatdaşlyk üçin açylýan mümkinçiliklere uly gyzyklanma bildirýändigi, munuň üçin Türkmenistanyň alyp barýan “Açyk gapylar” syýasatynyň we amatly maýa goýum ýagdaýynyň oňyn şertleri üpjün edýändigi bellenildi.
Duşuşygyň ahyrynda Braziliýa Federatiw Respublikasynyň Türkmenistandaky Adatdan daşary we Doly ygtyýarly Ilçisi Marsel Fortuna Biato milli Parlamentiň ýolbaşçysyny däp bolan türkmen-brazil gatnaşyklaryny pugtalandyrmak babatda ähli tagallalaryny gaýgyrmajakdygyna ynandyrdy.
