2024-nji ýylyň 19-njy dekabrynda Malaýziýa resmi saparynyň çäginde Prezident Serdar Berdimuhamedow başlyk we esasy ýerine ýetiji direktor Tan Şri Tengku M.Taufigiň ýolbaşçlygynda Malaýziýanyň «Petronas» kompaniýasynyň ýolbaşçylary bilen duşuşdy.
Duşuşykda hyzmatdaşlygyň ileri tutulýan ugurlary hem-de döwrüň talaplary nukdaýnazaryndan, onuň häzirki ýagdaýy we geljegi ara alnyp maslahatlaşyldy.
Türkmenistanyň energetika mümkinçilikleriniň ulanylmagyna Malaýziýanyň «Petronas» kompaniýasynyň uly goşant goşýandygy aýratyn bellenildi. Kompaniýa 30 ýyla golaý wagtyň dowamynda Türkmenistanda uglewodorod serişdelerini çykarmak boýunça durmuşa geçirilýän taslamalara işjeň gatnaşýar. Şeýle hem nebitgaz pudagy üçin ýokary derejeli hünärmenleri taýýarlamakda degişli işleri alyp barýar.
Duşuşygyň dowamynda Türkmenistanda amala aşyrylýan ykdysady ösüş maksatnamalaryny, senagat pudagyndaky özgertmeleri we işewürlik üçin döredilýän amatly şertleri göz öňünde tutmak bilen, hyzmatdaşlygy täze ugurlar boýunça mundan beýläk-de işjeňleşdirmegiň mümkinçilikleri ara alnyp maslahatlaşyldy.
«Petronas» kompaniýasynyň ýolbaşçylary Gahryman Arkadagymyzyň ozal Malaýziýa amala aşyran saparlarynyň ähmiýetini belläp, Türkmenistanda netijeli iş alyp barmaga döredilen amatly şertler üçin döwlet Baştutanymyza hoşallyklaryny beýan etdiler hem-de özara bähbitli hyzmatdaşlygyň geljekde-de üstünlikli dowam etdiriljekdigine ynam bildirdiler.
Soňra döwlet Baştutanymyz «Petronas» binasynyň «Skybridge» syn ediş köprüsine bardy. Bu ýerde kompaniýanyň ýolbaşçylary döwlet Baştutanymyzy binanyň taryhy hem-de aýratynlyklary bilen tanyşdyrdylar.
Soňra Türkmenistanyň Prezidenti Kuala-Lumpur şäheriniň Halkara howa menziline bardy.
Howa menzilinde Prezident Serdar Berdimuhamedow Malaýziýanyň resmi wekili bilen söhbetdeş boldy. Söhbetdeşligiň dowamynda iki ýurduň arasynda ýola goýlan hyzmatdaşlygyň ugurlaryň giň gerimi boýunça yzygiderli ösdürilýändigi bellenildi. Wekil pursatdan peýdalanyp, döwlet Baştutanymyzy resmi saparynyň üstünlikli geçmegi bilen gutlady hem-de iki ýurduň ýokary derejedäki özara saparlaryna bagyşlanan ýörite neşiri sowgat berdi.
Prezident Serdar Berdimuhamedow hoşniýetli sözler hem-de sowgat üçin minnetdarlyk bildirdi.
Türkmenistanyň Prezidenti resmi saparyny tamamlap, Watanymyza ugrady.
