2025-nji ýylyň 9-njy ýanwarynda Türkmenistanyň Päkistandaky Ilçihanasynyň wekilleri Strategiki barlaglar, işläp taýýarlamalar we seljeriş institutynyň (ISSRA) Milli logistika korporasiýasy (NLC) bilen bilelikde gurnamagynda geçirilen «Sebitleýin söwda we arabaglanyşyk: täze gözýetimleri we mümkinçilikleri açmak» atly halkara seminara gatnaşdy.
Çärede Azerbaýjanyň, Eýranyň, Gyrgyzystanyň, Täjigistanyň, Türkmenistanyň we Özbegistanyň Pakistandaky ilçileri, şeýle hem pakistanly we daşary ýurtly ykdysady ugra ýöriteleşen hünärmenler çykyş etdiler.
Seminarda çykyş edenler Merkezi we Günorta Aziýa ýurtlarynyň arasyndaky söwda-ykdysady hyzmatdaşlygyň ägirt uly geljegini bellediler we bu ugurda bar bolan mümkinçiliklerden peýdalanmagyň ýollaryny ara alyp maslahatlaşdylar.
Türkmenistanyň Ilçisi A.Möwlamow seminarda çykyş edip, ýurduň daşary syýasatynyň iň möhüm ugurlarynyň biri hökmünde ulag we energetika pudagynda hyzmatdaşlygy ösdürmekde Türkmenistanyň işjeň orny barada gürrüň berdi.
