Türkmenistan bilen Ysraýylyň daşary syýasy edaralarynyň ýolbaşçylarynyň arasynda geçirilen telefon gepleşikler barada

Şu gün, 2023-nji ýylyň 20-nji iýunynda, Türkmenistanyň daşary işler ministri Raşid Meredow bilen Ysraýyl Döwletiniň daşary işler ministri Eli Koen bilen telefon söhbetdeşligi geçirildi. Onuň dowamynda ikitaraplaýyn hyzmatdaşlygyň birnäçe meselelerine seredildi.

Hususan-da, taraplar iki ýurduň işewürler birleşikleriniň arasynda göni gatnaşyklary ýola goýmak arkaly söwda-ykdysady hyzmatdaşlygy giňeltmek barada pikir alyşdylar.

Türkmen tarapy köptaraplaýyn meýdançalarda, ilkinji nobatda, BMG-niň we beýleki abraýly halkara guramalaryň çäklerinde özara gatnaşyklaryň işjeň ýagdaýda alnyp barylýandygyny belledi.

Telefon söhbetdeşligi Ysraýyl tarapynyň başlangyjy bilen geçirildi.