Şu gün, 2023-nji ýylyň 12-nji awgustynda Awaza milli syýahatçylyk zolagynda gibrid görnüşde Hazar deňziniň gününe bagyşlanan "Hazar deňzi - Parahatçylyk we dostluk deňzi" atly ylmy-amaly maslahaty açyldy.
Wekilçilikli foruma Türkmenistanyň Mejlisiniň başlygy, Ministrler Kabinetiniň agzalary, Türkmenistanyň ministrlikleriniň we pudak edaralarynyň ýolbaşçylary, Türkmenistanda akkreditirlenen diplomatik wekilhanalaryň, halkara guramalarynyň wekilhanalarynyň ýolbaşçylary we wekilleri hem-de daşary ýurt we milli habar beriş serişdeleriniň ýolbaşçylary gatnaşýar.
Forumyň umumy mejlisinde Türkmenistanyň Daşary işler ministri R.Meredow, Türkmenistanyň Daşky gurşawy goramak ministri Ç.Babanyýazow, Azerbaýjanyň, Eýranyň, Gazagystanyň, Russiýanyň Ilçihanalarynyň ýolbaşçy wekilleri çykyş etdiler.
Çykyşlarda Türkmenistanyň Hazar sebitindäki iň möhüm proseslere işjeň gatnaşýandygy we parahatçylyk, ylalaşyk we özara bähbitli hyzmatdaşlyk pikirlerine ygrarlydygy beýan edildi. Bu nukdaýnazardan, Türkmenistanyň Prezidenti Serdar Berdimuhamedowyň ýolbaşçylygynda ekologiýa we daşky gurşawy goramak, şol sanda Hazar deňziniň basseýninde halkara hyzmatdaşlygynyň durmuşa geçirilmegi ugrunda alnyp barylýan netijeli syýasat babatynda bellenildi.
Şeýle hem, Türkmenistanyň Hazar meselesinde yzygiderli we täsirli syýasy gepleşikleri amala aşyrmaga gönükdirilen iň möhüm başlangyçlary we pikirleri yzygiderli öňe sürýändigi nygtalýar.
Maslahata gatnaşyjylar Hazarýaka döwletleriniň arasynda ýakyn hyzmatdaşlygy dowam etdirmegiň zerurdygyny aýtdylar.
Maslahatyň işi dowam edýär.
