2024-nji ýylyň 28-nji noýabrynda Türkmenistanyň Daşary işler ministrliginde Türkmenistanyň Daşary işler ministriniň orunbasary Mähri Bäşimowa bilen ÝHHG-niň ykdysady we ekologiýa işiniň utgaşdyryjysy Bakyt Žusupowyň arasynda duşuşyk geçirildi.
Duşuşygyň dowamynda taraplar «ÝHHG-niň çäginde parlament diplomatiýasy: dialog – abadan we asuda geljek üçin hyzmatdaşlygy ýola goýmagyň guraly» atly ikinji Aşgabat maslahatynyň sebit dialogyny berkitmekdäki, howpsuzlygy, pugta we durnukly parahatçylygy üpjün etmek üçin toplumlaýyn çemeleşmeleri ilerletmekdäki ähmiýetini bellediler.
Söhbetdeşler Türkmenistan bilen ÝHHG-niň arasynda, hususan-da, ÝHHG-niň işiniň ikinji – ykdysady we daşky gurşaw ölçegleriniň çäginde uzakmöhletli netijeli hyzmatdaşlygy kanagatlanma bilen bellediler. Bu ugurlarda durmuşa geçirilýän taslamalaryň we maksatnamalaryň ähmiýeti beýan edildi.
Şeýle hem, ÝHHG bilen hyzmatdaşlygyň geljegi, hususan-da, energetika we daşky gurşaw howpsuzlygy, ulag özara arabaglanyşygy we beýleki möhüm ugurlarda özara gatnaşyklaryň täze formatlaryny döretmek mümkinçilikleri ara alnyp maslahatlaşyldy.
