2025-nji ýylyň 4-nji ýanwarynda Türkmenistanyň Daşary işler ministrliginiň Halkara gatnaşyklary institutynda Türkmenistanyň Prezidenti Serdar Berdimuhamedowyň “Magtymguly – dünýäniň akyldary” atly täze kitabynyň tanyşdyrylyş dabarasy geçirildi.
Çärä ýurdumyzyň daşary syýasat edarasynyň ýolbaşçy düzümi we wekilleri, Türkmenistanda işleýän diplomatik wekilhanalarynyň we halkara guramalarynyň wekilhanalarynyň ýolbaşçylary we işgärleri, institutyň professor-mugallymlary we talyplary, şeýle-de KHBS-iň wekilleri gatnaşdylar.
Tanyşdyryş dabarasynda Türkmenistanyň Daşary işler ministrliginiň Halkara gatnaşyklary institutynyň rektory Gülşat Ýusupowa, Türkmenistanyň Ministrler Kabinetiniň Başlygynyň Orunbasary, Daşary işler ministri Raşid Meredow, Gyrgyz Respublikasynyň Türkmenistandaky Adatdan daşary we Doly ygtyýarly Ilçisi Azizbek Madmarow, Täjigistan Respublikasynyň Türkmenistandaky Adatdan daşary we Doly ygtyýarly Ilçisi Wafo Alibek Niýatbekzoda, Hindistan Respublikasynyň Türkmenistandaky Adatdan daşary we Doly ygtyýarly Ilçisi Madhumita Hazarika Bhagat, Özbegistan Respublikasynyň Türkmenistandaky Adatdan daşary we Doly ygtyýarly Ilçisi Rawşanbek Alimow, ÝHHG-niň Aşgabatdaky merkeziniň ýolbaşçysy Jon MakGregor, şeýle-de Türkmenistanyň ylym we bilim işgärleri çykyş etdiler.
Tanyşdyrylyş dabarasynda edilen çykyşlarda Türkmenistanyň Prezidentiniň görnükli söz ussadynyň mirasynyň, onuň dünýä edebiýatyna goşan goşandynyň, şahyryň ýubileýi mynasybetli guralan çäreleriň giňden beýan edilýän “Magtymguly – dünýäniň akyldary” atly täze kitabynyň çapdan çykmagynyň ähmiýeti bellenildi. Akyldaryň durmuş ýolunyň we döredijiliginiň ylmy esasda öwrenilişi, şahyryň pähim-parasatly wesýetleriniň parahatçylygy pugtalandyrmakdaky orny, şeýle-de “Pähim-paýhas ummany Magtymguly Pyragy” diýen şygara beslenen 2024-nji ýylda geçirilen halkara çäreleriň ähmiýeti barada gürrüň berýän bu ajaýyp kitap Täze ýylyň öňüsyrasynda mynasyp sowgat boldy.
Nygtalyşy ýaly, kitap owadan fotosuratlar bilen bezelip, ýokary çaphana usulynda, üç dilde – türkmen, rus we iňlis dilleriniň hersinde aýratyn kitap görnüşinde çap edildi. Sekiz bölümden ybarat bolan neşir giň okyjylar köpçüligine, ylmyň we çeper edebiýatyň muşdaklaryna, Magtymgulynyň döredijilik mirasyny öwrenijilere niýetlenendir.
Çykyş edenler Magtymguly Pyragynyň örän baý edebi mirasynyň Türkmenistanyň daşary syýasatynyň esasyny kesgitländigine, şahyryň parahatçylyk, adalatlylyk, ynsanperwerlik, dostluk we doganlyk, hemmä we her kime hormat goýmak taglymatlarynyň daşary ýurtlar bilen alnyp barylýan özara gatnaşyklara möhüm täsir edýändigine aýratyn üns berdiler.
Dabara gatnaşyjylar täze kitabyň şahyrynyň we akyldarynyň baý edebi mirasyna akyl ýetirmegiň örän gymmatly açary boljakdygyna ynam bildirdiler.
Çäräniň ahyrynda oňa gatnaşyjylar Türkmenistanyň Prezidenti Serdar Berdimuhamedowyň adyna Ýüzlenme kabul etdiler.
